Nationwide: Tot 6 000 verontriefLE ROUX SCHOEMANEN CHERICE SMITH
KAAPSTAD. – Nadat die lugvaartreguleerder reeds in September snuf in die neus gekry het oor die instandhouding van Nationwide se vliegtuie, en een van sy vliegtuie verlede maand ’n noodlanding moes uitvoer, is dié lugdiens se vlerke Donderdag geknip.
Tot 6 000 passasiers kan volgens me. Charmaine Thomé, Nationwide se woordvoerder, verontrief word deur die besluit om dié lugdiens se 16 vliegtuie te hok. Passasiers wat gister gewag het om by ander lugdienste geholpe te raak, was ontstoke.
Met Die Burger se besoek aan die Kaapstadse internasionale lughawe is Nationwide-passasiers deur beamptes na ander lugdienste soos kulula. com en British Airways verwys.
’n Nationwide-beampte het gesê passasiers kry ’n koepon om op ’n vlug geplaas te word.
Passasiers met wie Die Burger gesels het, was ontstoke.
Me. Maria Fernandes (26) van Pretoria wat verlede Saterdag met Nationwide na Kaapstad gevlieg het, het gesê sy is baie teleurgesteld omdat sy nie vroeër oor die vertraging ingelig is nie.
“My vlug is veronderstel om 14:35 te wees. Nou moet ek tot wie weet wanneer wag. Ek is nie eens seker of ek huis toe kan gaan nie. Hulle móét vandag (gister) nog ’n plan maak,” het sy ontsteld gesê.
Me. Rosemary Olivier (46) van Kraaifontein wat op pad na haar man in Port Elizabeth was, het gesê sy weier om ure lank vir ’n vlug te sit en wag. “Jy kan kies tussen ’n koepon vir ’n ander vlug of jou geld terugkry. Ek gaan tot 17:00 wag en as ek nie slaag nie, gaan ek huis toe en my geld terugkry.”
Volgens haar is die ander lugdienste se vlugte reeds vol. “Dit is skoolvakansie; so, dit is ’n slegte tyd. Hoekom vandag? Dit is absoluut skokkend.”
Die hele deurmekaarspul kom nadat bevindings uit ’n gereelde instandhoudingsinspeksie van Nationwide se versieningsorganisasie na die Burgerlugvaartowerheid (BLO) se uitvoerende kommissaris, mnr. Gawie Bestbier, verwys is en ’n tweede “oudit” van stapel gestuur is, volgens me. Phindiwe Gwebu, ’n BLO-woordvoerder.
Op 7 November het passasiers dit byna ontgeld toe ’n Nationwide Boeing 737-200 moes terugkeer aarde toe nadat ’n enjin afgeval het.
“Daar is tyd (aan Nationwide) gegun, maar die BLO is steeds nie tevrede met wat die versieningsorganisasie vermag het nie, daarom het ons die besluit bekragtig,” het Gwebu gesê.
Intussen is Nationwide-vliegtuie volgens Gwebu gehok in dié drastiese stap wat, volgens haar, baie seldsaam vir ’n groot passasierslugdiens is.
Gwebu het egter benadruk dat die besluit die gevolg van die gereelde ondersoek na die maatskappy se versieningsorgansisasie is, en nie spesifiek op die hakke van die verlore-enjin-episode volg nie. Ook Thomé het dit beaam.
Die BLO het ná dié voorval algemene inspeksies van die betrokke soort vliegtuie opgedwing en was volgens haar tevrede met die lugdienste se samewerking in daardie verband.
In ’n ope brief aan “gewaardeerde kliënte” het Nationwide gister op sy webwerf verklaar dat hy nie ’n “langdurige ontwrigting” verwag nie.
http://www.dieburger.com/Stories/News/15.0.3393113009.aspx